Nasjonála unneplågo ja unneplågogiela

Jus dån gullu soames dajs nasjonála unneplågojda dujna l rievtes adnet duv nasjonála unneplågogielav aktavuodajn fábmudagáj. Dánna dån oattjo diehtet makkir riektá dujna l ja makkir ádnomusájt dån máhtá adnet duv gielldaj ja ietjá fábmudagájda.

Svierik la jage 2000 rájes oasen Europaráde rabmokonvensjåvnån suodjalit nasjonála unneplågojt ja eurohpá duvddemusán rijkaoasse- ja unneplågogiela. Dan oassálasstema baktu dåbdåstuvvin juda, roma, sáme, svieriksuomaga ja durnosvákkega degu nasjonála unneplåhkuj. Dalloj aj dåbdåstuvvin jiddisch, romska (romani chib), sámegiella, suobma ja meänkieli degu unneplågogiela.

Nasjonála unneplågo ja unneplågogiela galggi suoddjiduvvat ja doarjoduvvat

Láhka (2009:724) nasjonála unneplågojda doajmmá ålles Svierigin. Lága javllá at nasjonála unneplågogiela galggi suoddjiduvvat ja doarjoduvvat. Dat gut gullu nasjonála unneplåhkuj galggá adnet riektáv bisodit ja åvddånahttet suv kultuvrav, ja aj adnet máhttelisvuodav oahppat ja åvddånahttet suv unneplågogielav.

Háldadimfábmudagá galggi vaddet nasjonála unneplågojda máhttelisvuodav mierredibmáj dajda gatjálvisájda ma gulluji dajda ja nåv guhkás gå la máhttelis rádedit unneplågoj dakkir gatjálvisájn. Fábmudagá hähttuji diededit dajt nasjonála unneplågoriektájt ja almulasj åvdåsvásstádusájt unneplågolága milta.

Sierra riektá suobmaj, meänkielij ja sábmáj

Stockhålma la háldadimguovllo suobmaj, meänkielij ja sábmáj. Dat sisadná at dån gut ságasta suomav, meänkieliv jali sámev, ja åro Stockhålma gieldan, aná sierra riektájt.

Dån gut åro gieldan háldadimguovlojn aná riektáv adnet aktavuodav fábmudagáj duv ietjat gielajn, dajs sierra ássjijs gånnå fábmudahka mierret. Dån galga máhttet oadtjot vásstádusájt hålan ja tjállagin duv gielan. Fábmudahka máhttá mierredit sierra ájgev ja sajev gånnå viehkke vatteduvvá unneplågogielajn. Giellda la aj bággidum gárvedit åvddåskåvlåv ja vuorrasijsujtov, ållåsij jali enas oasev unneplågogiellaj, jus soames sávvá dav.

Förskola på nationella minoritetsspråk (täksta dárruj)

Vuorrasijhukso Stockholma stádan

Gielda gudi li háldadusguovlo hähttuji mierredit ulmmelijt ja njuolgadusájt sijá unneplågopolitihka bargguj.

Ieddnegielåhpadus

Máná gudi gulluji nasjonálaunneplåhkuj máhtti låhkåt unneplågogielav iednegielsuorgen. Válde aktavuodav duv skåvlå oahppa- ja vierggelájddistiddjijn jus dujna li gatjálvisá.