Vorsnos asjas to misal an gla dràbbrahisp ta dràbbrahispan, pre puranoboddrande ta divusbukjakeripen. Diro trisser vorsnus thaj karna vorsnos posittar, sjyllar ire keribe bási fòrons strotor ta than, karna diro roder keribmukhin, gostir voro fakkethan ta rastrip ofisi, jar to librikheret ta to nandvusjtan.
Fòrons infrastruktura
Fòrons dochala aur gla te vorsnos kammar servit pani solduj an thavderi ta an siror ta paniflússa, te fulanneran ta voro avarar ta bèrothan kerrephar, te hajphejibet an Stockholm kammar dolle hemcukar pakjalapa, te klimaphirnoa ta resutnoa khérar keribs ta maskarvakelas. Dova sávri kammar Stockholm jeck jikkhutno digitali infrastruktura preal vorot phravda balresela savo keribs vri sast bùttar gla te kava digitalia sarinipet nasht bliddra panda hòrtare.
Kultúra ta mucktjiro
Kultúra honkar baroa ta barot – kava glasoroloa vorsnos preal to misale Kulturakheret Fóro teatrit ninna selipagenjs programanuktar basjtet trujalt, Kultuasdrabbrahisp gla sàss nuckor ta ternoa, Fórosmuseit ta Bukjatjirosmuseit ta voro solus dsanipevusjta Liljevalchs.Vorsnos dumodela aur solduj khedipesjibe ta kultúrajibbet gla te vorsnos kettanes nasht kerel jeck demokratijis ta jiddrade fóro. Sportithanar nandvusjtar, ávrigim, selinothem ta naturaparko honkar hari misal pre sar fóron telélokkir gla sàss stockholmare te kamma jeck butike mucktjiro.
Dumo an keria situacijar
Vorsnos honkar aur dolle savo trissar sàss savo hòftarer ulavelat dumo an jibben. Kava nast asha savo dràbbrahispans godidari, jeck boende boddra dumojar , kiskomusch ire socijalimàngare. Disavo adhinela kava pre dukkepa, nakismerel ire kommoni vavoret trauma, to misal sàss dolle savo naschat to vorsnus fann maripe ta binikiper an vavra kotar attjer sumnalen. Disavo honkar kava kommoni vavoret savo kerre to te att nàntis zori attjer hilpre.
Politika ta demokratija
Diro nast asha ninna ta prekerepa. Diro ta sàss vavra stockholmare savo ler hangoa an komúnan pottor savia savo paldela fóron. Sako trinto jecktodivus beskedipe komúnaingariben an Fòrokheren ta diron honkar sukaravade te ava ta schòne pre so dolle rakkra bási. Diros fórolaijar kammar aur trissepan savo honkar phavdat gla sàss ta te dova nast diro aur mukhela plo rodi pre sàvot savo diro mangela nasht glahòrtare.